八達通O!ePay(好易畀) 官網 oepay.com.hk，呢個名好難聽又核突嘅手機支付工具同Tap&Go係完全唔同嘅，好易畀呢個App大部份情況下係唔可以用嚟買嘢，只係可以用嚟過數。
之但係呢個過數功能其實相當好用。你可以增值八達通，又可以由八達通過返數入去呢個App。
同Tap&Go拍住賞卡最大嘅分別就係Tap&Go卡係有入無出，而好易畀就可以過返數入銀行而唔需要俾手續費。但加入銀行戶口，就要等兩個禮拜。
主要功能
好易畀嘅讀卡功能需要有增值或者扣款嘅八達通號碼，防止啲人係街道隨便讀人哋張八達通卡。而每一個戶口同時只能夠有十張登記左嘅八達通卡。唔支援舊版八達通卡，例如我張首創版八達通卡…
如果你需要過數俾朋友，如果佢不在身邊，佢需要有一個「O!ePay」嘅戶口，而過數係即時嘅。上限係兩日3000港元，金管局規定。如果佢喺你身邊，你就可以直接攞張八達通卡，直接經由手機上嘅NFC功能（ iPhone則要購買一個Sony藍牙讀卡器） ，除咗提錢重可以入錢。呢個功能我對我同同事食飯非常之有用，因為佢哋一般來講唔太願意開下載個新嘅App用嚟收款付款，但每一個香港人都有八達通卡（好似係）。同樣道理，呢一個功能可以幫朋友或者同事增值八達通卡，咁你就可以賺到飛行里數或者信用卡積分啦。
- 入錢/扣錢流程：打開App > 登入 > 按選項 > 轉入/轉出 > (如未加八達通卡號) 加卡 > 輸入金額 > 確定 > 拍卡
- 過數流程: 打開App > 登入 > 按選項 > 按畀錢 > 畀錢朋友 > 揀朋友 > 輸入備註 > 輸入金額 > 發送
拿回塵封八達通卡的餘款
如果你家裡有幾張「銷售版」八達通卡，因為冇得退，又負咗錢，擺埋一二邊好嘥料，「好易畀」App就係救星了。首先你過錢入去到張卡變返正數$0.1，然後再扣返$35.1過入「好易畀」帳戶內，咁你就可以完全用得返你張卡嘅按金了。
同樣道理，如果你喺7-11買咗$98蚊嘅八達通SIM，都可以全數攞返內藏嘅$35按金，但較複雜……基於某些不明原因，你係唔可以用Android「好易畀」讀返插咗入同一部機嘅八達通SIM，準備非常麻煩：你要一部具有NFC功能嘅Android電話插八達通SIM、一部iPhone、同埋八達通讀卡器。
不過，原理相當簡單：喺iPhone用「好易畀」讀喺Android電話嘅八達通SIM。
網上付款
另外一個功能，同佢自己公司出產嘅八達通App功能基本上重疊，就係網上付款功能。網上付款功能只支援極少數的網上商店，包括可在八達通官網買八達通產品、讀卡器、精品等等。而另一間支援的公司就是中國大陸的淘寶網，如果有些人對中國產品有信心，可以使用這個app來進行網上付款。
短評
於我來說這個app的功能就好像一部流動八達通卡增值器和交易工具，定位明顯不夠清晰。雖然這個工具比較好用，但是普及性似乎很低。用戶可以看到自己手機裏便的通訊錄內，有多少個朋友已經安裝了，我眼見就只有小貓三四隻。
優點：
可以儲到飛行里數或者信用卡積分
基本上可以直接進行面對面嘅八達通交易，無需對方安裝任何app
登記戶口只需要電話號碼，唔一定需要身份證明文件 (如果要提錢入銀行，則必需提交身份證)
缺點：
無法進行市面上購物交易
如果要係iPhone上面用，就一定要購買一個藍牙讀咭器，售價超過＄200。個讀咭器係日本Sony為咗日本本地嘅交通卡而推出嘅，可以讀取各種日本嘅交通卡包括西瓜卡等等。
似乎無法吸引用戶長期存放金錢於戶口內
下載: Google Play / Apple iTunes